جنوبی کوریا کی حزب اختلاف کے رہنما نے ہفتے کے روز 24 روزہ بھوک ہڑتال ختم کر دی ہے، پارٹی کے ایک ترجمان نے کہا ہے کہ پارلیمنٹ نے مبینہ رشوت خوری کے الزام میں استغاثہ کو ان کے خلاف وارنٹ گرفتاری جاری کرنے کی اجازت دینے کے حق میں ووٹ دیا ہے۔
ترجمان نے نامہ نگاروں کو بتایا کہ ڈیموکریٹک پارٹی آف کوریا کے رہنما لی جے میونگ فی الحال اسپتال میں داخل ہونے کے دوران عدالت میں حاضری سمیت ایک شیڈول برقرار رکھیں گے۔
استغاثہ نے رواں ماہ ایک ترقیاتی منصوبے سے متعلق رشوت ستانی کے الزامات کی تحقیقات کے لیے وارنٹ جاری کرنے کا مطالبہ کیا تھا۔ استغاثہ نے لی پر الزام عائد کیا ہے کہ جب وہ گیونگگی صوبے کے گورنر تھے تو انہوں نے ایک کمپنی سے 80 لاکھ ڈالر غیر قانونی طور پر شمالی کوریا منتقل کرنے کے لیے کہا تھا۔
ان پر یہ بھی الزام ہے کہ جب وہ سیونگنم شہر کے میئر تھے تو انہوں نے میونسپل ڈیولپمنٹ کارپوریشن کی جانب سے 20 ارب وان (15 ملین ڈالر) کے نقصان پر اپنی ذمہ داری کی خلاف ورزی کی تھی۔
گزشتہ برس جنوبی کوریا کے صدارتی انتخابات میں قدامت پسند یون سک یول سے ہارنے والے لی نے ان الزامات کو ‘افسانوی’ اور ‘سیاسی سازش’ قرار دیتے ہوئے غلط کاموں کی تردید کی ہے۔
انھوں نے 31 اگست کو اپنا احتجاج شروع کیا تھا، جس میں حکومت کی معاشی بدانتظامی، میڈیا کی آزادی کو لاحق خطرات اور جاپان کی جانب سے تباہ شدہ فوکوشیما جوہری پلانٹ سے گندے پانی کے اخراج کی مخالفت کرنے میں ناکامی اور دیگر وجوہات شامل تھیں۔
