حکمران جماعت تحریک انصاف نے آزاد کشمیر کے 10 اضلاع میں ہونے والے انتخابات کے دوران بیشتر نشستوں پر برتری حاصل کرلی۔
10 ضلعی کونسل میں ہونے والے انتخابات کےد وران پی ٹی آئی نے مظفرآباد، نیلم، باغ، وادی جہلم، سدھ نوتی، کوٹلی اور میرپور اضلاع میں چیئر مین کی نشستیں اپنے نام کیں جب کہ مسلم لیگ (ن) نے پونچھ، حویلی اور بھمبر میں چیئرمین شپ حاصل کرنے میں کامیاب رہی۔
پانچ میونسپل کارپوریشنوں میں سے پی ٹی آئی کے کونسلرز میرپور، کوٹلی اور باغ میں میئر منتخب ہوئے جب کہ راولاکوٹ اور مظفرآباد میں بالترتیب جموں کشمیر پیپلز پارٹی (جے کے پی پی) اور مسلم لیگ (ن) نے کامیابی حاصل کی۔
میونسپل کارپوریشن مظفرآباد میں مسلم لیگ (ن) کے سید سکندر گیلانی اور پیپلز پارٹی کے خالد اعوان میئر اور ڈپٹی میئر منتخب ہوئے، مظفرآباد میں میں اپ سیٹ نتیجہ سامنے آیا جہاں پی ٹی آئی کے امتیاز احمد عباسی چیئرمین جب کہ متحدہ اپوزیشن کے راجا ناصر لطیف وائس چیئرمین منتخب ہوئے۔
باغ میں پی ٹی آئی کے ریٹائرڈ میجر عبدالقیوم اور افراز گردیزی میئر اور ڈپٹی میئر جب کہ سردار آصف اور فہیم فاروق بالترتیب چیئرمین اور ضلع کونسل کے وائس چیئرمین منتخب ہوئے۔
کوٹلی میں پی ٹی آئی سے تعلق رکھنے والے چوہدری محمد تاج اور راجا ریاست محمود بالترتیب بطور میئر اور ڈپٹی میئر میونسپل کارپوریشن منتخب ہوگئے۔
ڈسٹرکٹ کونسل میں پی ٹی آئی کے چوہدری عبدالغفور چیئرمین منتخب ہوئے جب کہ ڈپٹی چیئرمین کا عہدہ مسلم لیگ (ن) کے عمیر نعیم جیتنے میں کامیاب رہے۔
میرپور میں پی ٹی آئی کے عثمان علی خالد اور محمد رمضان چغتائی میونسپل کارپوریشن کے میئر اور ڈپٹی میئر جب کہ پی ٹی آئی سے تعلق رکھنے والے نوید اختر گوگا اور عدنان شوکت بالترتیب چیئرمین اور وائس چیئرمین ضلع کونسل منتخب ہوئے۔
ونچھ میں مسلم لیگ (ن) کے جاوید شریف اور پیپلز پارٹی کے سردار امتیاز بالترتیب ضلع کونسل کے چیئرمین اور ڈپٹی چیئرمین جب کہ جے کے پی پی کے عبدالنعیم خان اور آزاد کونسلر قاضی نثار میونسپل کارپوریشن راولاکوٹ کے میئر اور ڈپٹی میئر منتخب ہوئے۔
نیلم، وادی جہلم اور سدھ نوتی ضلع کونسلز میں بھی پی ٹی آئی کے چیئرمین اور وائس چیئرمین منتخب ہوئے۔
حویلیاں میں مسلم لیگ (ن) کے امیدوار ضلع کونسل کے چیئرمین اور وائس چیئرمین منتخب ہوگئے۔
بھمبر میں مسلم لیگ (ن) کے ڈاکٹر محمد یوسف اور پی ٹی آئی کے راجا خاور ضلع کونسل کے چیئرمین اور وائس چیئرمین منتخب ہو گئے۔
